Ano novo, vita vecia!
Fameja Alpina > Toni e Bepi
Toni e Bepi
di Isidoro Perin
Ano novo, vita vecia!
- Bon ano Toni! Bevetu ’n’onbra?
- Auguri Bepi! Meio un bruè!
- Ciapa qua ’na luganega, cussì el va ’so mejo.
- Bel ciò ’sto’ Panevin! Ma e zaive dove vae?
- A’a matina Toni: ciapa el sachét e va a farina.
- Ma se i à pena dita che i sbassa ’e tasse.
- Ai siori! Toni! Ai siori i ghe ’e sbassa! No a noaltri. Bisogna che te ciape almanco disdotomie euro l’anno par ver dirito.
- Se vesse disdotomie euro l’ano no varìe bisogno che i me sbasesse ’e tasse.
- Però adess par che ’a provincia sia drio provar a sparagnar s-chei. Zaia l’à conprà sie motofalciatrici ecologiche.
- Bepi!?… Basta onbre!
- Ma no te à sentì che l’è stat in fiera Santa Lucia a conprar sie muss par taiar l’erba drìo i foss. El se à incort che co’ ’e imprese ’a ghe costa sentomie euro l’ano.
- Maria Vergine! Pensar che co’ se ièra in fameja ’e femene tegnea i cunici par conprarse ’e calse e ghe tochea ’ndarse trovar l’erba drìo i foss parchè i spagner e i prà no se podéa tocarli! Qualche volta ’e ’ndèa istesso de scondiòn, ma se s’incordèa el paron ’e ciapèa un sac de paròe!
- I tenpi i è canbiai Toni. Ma serte robe le ’se restae intate. Pensa che Zaia el se ha presentà in fiera col (1)sansèr.
- Quel de ’na volta, che’l spetèa senpre in ostaria, che’l giurèa sbatèndo ’l capel par tera, che’l ghe ciapèa e man a quel che vendèa e a quel che conprèa e el ghee metea una su che altra pa’ far l’afar?!
- Si Toni! Proprio cussì. Pensa che i ga cumbinà sie mussi par domiesinquesento euro!
- Maria Vergine! Quanti s-chei!
- Ma varda che do musse le ’se piene! E cussi varemo oto mussi.
- Che fortuna! Da stano sarà ànca pi’ fasie far el presepio, parfin drìo e strade.
- Par adess, co tute e crose che ghe n’è l’è pi fassie far ’a Via Crucis.
- Sperem che st’ano el me porte un fià de iudissio a tutti, spesie ai zoveni che i corre fa mati!
- Saeute Toni! A ti e a tuti i Alpini!
Glossario:
(1)sansèr: mediatore.