Atenti ae spie!
Fameja Alpina > Toni e Bepi
Toni e Bepi
di Isidoro Perin
Atenti ae spie!
- Ciao Toni! Bevetu un’onbra?
- Parla pian, si nò ’i te sinte.
- De cossa gatu paura ostrega?
- Sta’ atento parchè semo tuti spiài.
- Ma varda che noaltri no gavemo in scarséa i fail dea Ferrari.
- Si ma se te ferma a Benemerita ’a te spia cossa che te gà sul stomego.
- Però se sem qua, l’è ànca parchè a ven quasi senpre fata franca, fin da tosatéi.
- Mi ghe gò fregà tante volte ’a marmeata a me nona, ma co’ ’a me peschèa e ièra visciàe sue gambe.
- E co’ se ’ndea a robar i perseghi sul camp de Nani?
- ’Na volta el me ha corest drìo col forcon.
- Lu nol me ha ciapà, ma el ghe ha contà tut a me pare e co’ son rivà casa e l’ò vist cavarse ’a sentura… me vien ancora i sgrisui!
- Anca l’ora ièra difissie farla franca.
- Gnanca co’ ’e tose andéa meio: - Dove situ stat ieri sera che te si rivà dopo mesanot? ’I te ha vist vissin a casa dea Maria!- Come féo saverlo me pare, se’l ièra in let.
- Co’ te rivéa tardi… Scarpe in man, a scuro, tanto a luce no ghe ièra, in (1)scarpinée fin a piè del let, e drio el cul to mare col lumin a petrolio (2)inpissà: - Fiol d’un can dove situ stat fin dess? Varda che ora che è!- E ’a matina dopo to pare par dispeto el te ciaméa in stàea meza ora prima.
- Ma el pèso ièra soto naia: - chi sa bater a macchina?... - Mì!… - Mì!… -Mì!... (3)Ramassa par tuti!
- E come feo el Capitano all’adunata dea matina a vedér e scarpe sporche dell’ultimo dea fìa.
- Anca el maresial de zornada no’l s-chersea: el véa coraio de controear se i calzhett ièra de (3)ordinansa prima de assarte ’ndar in libera uscita.
- E in libera uscita? Se vea el nostro bel da far a star attenti a saeudar maresciai, tenentini, ronda.
- Se te ghe ’a féa a tornar in caserma sensa sinque dì de consegna te ièri un vero alpin.
- Adess invesse no bisogna farse fregar dae tasse, dae multe, dae scadense dee boete, dal mutuo, dàa borsa…
- E qualche volta ànca dàa femena!
- Aa saeute Bepi!
Glossario:
(1)scarpinée: solo con i calzini - (2)inpissà: acceso - (3)Ramassa: scopa - (3)ordinansa: previsti dal protocollo.