Atenti al fuoco "amico"!
Fameja Alpina > Toni e Bepi
Toni e Bepi
di Isidoro Perin
Atenti al fuoco "amico"!
- Ciao
Toni! Come mai da ’ste bande?
- In piassa
no te pol ’ndar, al bar te toca farte dar un’ombra su bicèr de plastica e fora
pàa porta in pressa.
- Se te à
bisogno de pissar po’ te toca ’ndar casa de corsa.
- L’è un
problema ànca quel, spessie par noàltri che ven qualche àno sul gropòn.
- L’è mèio
star qua sul’ort a pareciàr ‘e culière par semenar un fià de saeata e intanto
ghe fae compagnea ae gaine.
- Sì sì! Ma
varda de non star massa vissìn al punèr che l’è pericoeoso co’ sti ciari de
luna.
- Ò sentì
sua radio che l’è sucess calcossa che riguarda ’e gaine ma no ò capì ben cossa.
- A Vivaro!
Sul poìgono del Cellina un blindà dell’Esercito el ghe à tirà ’na bomba proprio
dentro su un punèr e l’à fat ’na strage de poeàstri.
- E cussì,
dopo ’a pandemia del’aviaria, quea del covid adess se scuminsia da novo coi
atentati!
- Ma no! L’è
stat un sbaglio. No te te ricorda soto a naja co’ se ’ndéa tirar e bonbe a man:
ghe ièra sempre quel che no’l véa mai tirà un sass in vita soa.
- Te ’o
capìi co’ l’a ciapéa in man, e te vardei de star ben distante!
- E co’ te
’ndéi far i tiri? – Capitano el s-ciop no funsiona! – E intanto el se girea col
colpo in cana.
- E là si
ièra da ver paura.
- No è
canbià gnent, a vinti ani non ghe n’è judìssio!
- Se va
par quel, se no ghe n’è a vinti no ghe n’è gnanca a quaranta.
- Bepi! Ma
no te par che co’ ’a scusa de ’sto Covid sen deventai tuti un fià pi’ nervosi.
- Se te
ghe disi a uno: - Varda che te à ’a mascherina soto el naso, tirea su! – el
dovarìa ringrassiarte e meterla a posto.
- E invesse
bisogna che te stae atento parché no te sa mai come che la ciapa, ghe n’è ’sente
che ’i è stai inpenìi de bote par cussì poc.
- Quei,
magari che no ’i à ciapà el Covid, ma ’i è fora de testa.
- Prima che
’a me toche ànca a noaltri meio che bevén un’ombra, che me son portà drìo ’a
bozha sua sporta de paia.
- Bravo
Toni, però se metén soto a seresèra, distante dal punèr… no se sa mai!
- Grassie.
Cussì me sente pi’ sicuro; àea saeute Bepi!