Bisogna vardar davanti
Fameja Alpina > Toni e Bepi
Toni e Bepi
di Isidoro Perin
Bisogna vardar davanti!
- Toni! Ciapa qua un’onbra e assa star el giornal!
- Ciao Bepi! No te vee gnanca vist. Iere drìo vardàr ’e ultime novità.
- ‘Assa perder, si no, fra téegiornài, rassegne stanpa, votassion, partìe de baeon, papi da far, te fa ’na testa come ’na pignata!
- Satu che te gà rason. Però come se fea a no vardar a teevision co’ è mort el papa. Ièra tut el mondo che tegnea de ocio ’a so’ finestra.
- Noialtri alpini bisogna cavarse tant de’ capel, anche parchè el se ho gà mess in testa proprio Lù, par dimostrarme el so’ affetto.
- E te gà visto quanti fioi zoveni che i ’o gà veglià e che i gà pregà e cantà dì e not.
- Qua i me gà fat un fià pecà. Se vede che su tante nostre case manca ’a figura del pare de ’na volta, quel che ’l savéa insegnar, rispettar e farse rispettar.
- E manca anca ’a figura del nono, magari pien de’ doeori, ma che ’l ghe insegna ai fioi che ’a vita la è una soea, e no ’a dura par senpre.
- Adess però sen tutti contenti: finalmente ’ven el papa novo, Benedeto XVI°.
- Un todesco proprio dea Germania, ma mi me par che ’l sia senpre stat un dei nostri. Chissà cossa che ’l pensa de noialtri alpini?
- Beh! Mi pense che co’ tutti i alpini dea Protession Civie che ghe ièra a lavorar in piassa San Piero dì e not, par ’iutar i péegrini che voea saeudar papa Giovanni Paolo II°, el se abbia fat ’na bona inpression.
- Caro Bepi, me despiase, ma ’a vita la è fata cussì: ”Mort un papa i ghe ’n fa n’altro, mort un re i ghe ne fa tre, mort mi non i ghe ’n fa pì!”
- Passa qualche dì e dopo se se desmentega.
- A proposito de memoria, l’inverno l’è finì. Che fine hai fat i muss de Zaia?
- No te si mai passà pàa Postioma?… Dove che ’a strada la passa in trincea come i alpini sua prima guera mondiae.
- L’è tant che no ghe passe.
- Te gà da veder che spettacol: tante volte i se mette in sie-sete muss tutti in paro su ’a riva, come i alpini in adunata, e i va ’vanti e indrìo magnando tuti insieme. I me someia ’na motosega co ’a barra falciante larga quatro metri.
- Ostrega! Ma quanti ghe ne vol par poder taiar l’erba de tutte ’e strade?
- No so dirte. Par adess l’è un esperimento de poc pi’ de un chiometro, ma un doman…!?
- Senti Bepi! No è che co’ ’a scusa dei taiaerba ecologici, ai alpini ghe toche ciapar in carico i muss al posto dei mui!?
- No stà dirlo do volte Toni!… Aea saeute!… E no stà pensarghe massa, che no ’a devente vera!