Ciàcoe

Fameja Alpina > Toni e Bepi

Toni e Bepi

di Isidoro Perin

Ciàcoe

Ciao Bepi! Bevetu un’onbra?
Ma una sòea, però, che ò da guidar.
Oramai le è deventada ’na osession.
Come el tenp e ’l baeon.
A ’sent no sa parlar de altro.
I scuminsia al luni co ’a partìa: - A me squadra la è meio dea toa, i nostri i à pers ma i ièra pi’ bravi, l’arbitro no’l capisse gnent, l’allenator l’à sbaglià ’a formassion…
Co’ a va ben: “vemo vinto!” Co’ a va mal: “i ha pers!”
E l’è senpre colpa del’arbitro, dea sfortuna, dea piova, del sol sui oci… mai che sia colpa sòa!
Stavolta, par fortuna o par disgrassia, i europei i à durà poc par l’Italia.
Colpa de Donadoni, che l’è stat do ani in préstio, par tegnerghe calda a carega a Lippi.
E pensar che l’è stat cussì onesto, che non l’à vussù firmar ’a clausoea par ver ’na bona uscita.
Chei posti là non i è fati par ’sente bona de cuor.
E del tenp! Cossa me ditu?
Che son stuff de scoltar tute ’ste prevision, ghe n’è quei che dise che vegnarà fredo e piova, e quei che dise che vegnarà caldo e sec.
El tenp l’è restà da maridar par far quel che ’l vol!
E dopo ghe n’è quei, che co’ i te cata i te fa i ragi coi oci e i te domanda: -Come statu?-… Se te ghe dise: -Mal!- I vol saver cossa che te à, i dotori che te à visità, e cure che te à fat e se ta à speransa de sopraviver. Se te ghe dise: -Benon!- i te varda co’ sospeto:(-pussibie che no’l abia proprio gnent; e l’è ànca lu sora i anta!)
Bepi! Sue disgrassie te pol far marcà, sua saute invesse ghe n’è poc da dir.
Cussì se finisse de parlar senpre dee stesse robe.
Parchè, preferissetu parlar de poitica.
Toni! No, te prego, par l’amor de Dio.
Dopo un teegiornae che i à fat parlar tuti, destra, sinistra e centro, mi no capisse pì gnent.
Al posto dei gins elasticizai i ha inventà i discorsi co l’astico, che, a son de tirarlo da na banda e da chealtra, aea fine el se ronpe, e ’e ciàcoe càsca par tera come un pèr de mudande rote l’astico.
Bepi! Se no fusse che ’i o fa coi s-chèi nostri, me vegnarìa da rider!
Aea saeute, Toni!

Stampa