El lunario
Fameja Alpina > Toni e Bepi
Toni e Bepi
di Isidoro Perin
El lunario
- Ciapa qua Toni un’onbra de novo!
- Aea saeùte Bepi! Se ghe n’è ’l vin novo vol dir che sta par rivar el lunario de ’stano che vièn!
- Ah sì po’! Riva quel del Comun co tute ’date dée manifestassion del paese e quel del spissièr co’ tutte ’e domeneghe che ’a farmacia la è verta. E ’sti do qua bisogna meterli sul coridoio.
- Riva quel de Bepo Gobo, dée lune e dei travasi del vin… Mi ’l mete dadrìo ’a porta dea caneva.
- Riva quel del bechèr, del fornèr, de Frate Indovino e ànca del mecanico che, chissà parchè, l’è senpre pien de femene nude.
- E adess me spieghetu dove che te mete quel del mecanico?
- Sul garass po’, e ànca girà pa’ revess!
- Ma quel che no te pol far de manco l’è quel dée scoàsse se no te vol sbagliar meter fora ’a carta invesse del vièro.
- Co’ tuti ’sti caendari va finir che te meti fora ’e scoasse co’ l’è ora de travasar e te travasa el dì che te à da meter fora l’umido!
- Mi spète el caendario nostro, de “Fameja Alpina” parchè cussì ò tutte ’e commemorassion e ’e feste dei Alpini, l’è senpre déa stessa misura, e posse méterlo senpre al so posto in prima linea!
- Ò savést che l’è stat pensà par ’ndar trovar i monumenti che parla dea storia dei nostri Eroi sua Prima Guera Mondiae, qua, sul comun de Nervesa. Pensa che ’l s’intitoea “Quattro passi tra gli Eroi”
- E ora po’ guai a fàrseo scanpar!
- A proposito de storia te ricordetu dei caendari del barbièr de ’na volta?
- Se me ricorde! Soto e feste de Nadal me pare ’ndea farse i cavéi e ’l barbier ghe déa un caendario picinin, tut inciprià, che ’l ghe stéa in scarsèa dea jacheta. E dentro ghe ièra ’a baerina col tutù fat de piume.
- Bastéa suffiar soto el tutù che se ghe vedéa ’e ganbe! Mi savée che ’l ièra sua cassèa del comodin e ogni tant de scondion ’ndée suffiar sue piume… Se s’incontentéa de poc!
- Senpre mèio che far l’amor via feisbuk come che ’i fa dèss! Almanco quel ’l ièra un “gioco erotico interattivo”!
- E ànca ris-cioso! Altro che corerghe drio ai Pokemon! Se ’l me peschéa me pare me varìe ciapà do scufiott sue rece!
- Però vaéa ’a pena: i ièra ani che no te vedéa tante ganbe nude in giro.
- Par conquistàr ’na tosa te dovéa lotàr, tirar fora fantasia e coràio.
- Te vea da sfidar i futuri suoceri, esser senpre educato, mai parlar mal…
- Insoma ’a ièra ’na guera! Però vaea ’a pena de vinserla par poder sperar de veder ànca… aa parte pi’ alta del caendario!
- Che bei tempi Bepi! Ànca parchè se vea sì e no dièse ani!
- Oramai i è passai! Aea saeute Toni.