L'Adunata de Treviso
Fameja Alpina > Toni e Bepi
Toni e Bepi
di Isidoro Perin
L’Adunata de Treviso!
- Ciao Bepi! Bevetu un’onbra?
- Come no! Ostrega, almanco farse ’a boca bona.
- Visto che ’a ’sente se lagna senpre de tut.
- Però nessun se à lagna dea nostra Adunata.
- Bisogna dirlo che a Treviso tuti pol esser contenti.
- E po’ basta che te varde co ghe n’è stat problemi col treno.
- ’A Protession civìe la è deventada direttor del coro!
- ’Varda! Se ’a ’sente inparesse a cantar come che fa i Alpini ghe sarìa tanti problemi de manco.
- Te à vist a Torino cossa che è success par vardar ’na partìa in piassa!
- Cossa ocoréa spacar tute chée butiglie par tera!? Eo cussì che se fa festa?
- A Treviso i ghe n’à vèrt mièri de butiglie, ma mi, in tre dì, no ò vist gnanca un viero par tera.
- E po’, ò vist i tosatèi inamorài dei Alpini.
- Pensa che un cèo el me à vardà fiss e po’ el che à domandà a so pare: - Papà, ma quello è un Alpino vero? – Mi ò ciapà el capèl, ghe l’ò mess in testa e ghe ò dita: - Adess te si un Alpin ànca ti! – Pi content de lu no ghe ièra nessun!
- Però ò vist in giro massa Alpini inbriaghi.
- Se va par quea ’na volta ghe ne ièra ànca de pi’. E po’ adess i pi tanti no i c’entra gnent coi Alpini.
- Si, però i fioi me varda, e noaltri Alpini ven ’na gran responsbiità: par lori sen deventai un esempio de vita. In giro ghe n’è restà pochi altri cussì. No poden fregarli!
- A proposito Bepi satu che difarensa che passa tra un inbriago e un Alpin inbriago?
- No!
- L’inbriago tante volet el fa danàr, l’Alpin cioco invesse al sta chieto fin che ghe à passà ’a baea!
- Toni te ghe n’à senpre una! Aea saeute!