Meio na cantada che n'aspirina
Fameja Alpina > Toni e Bepi
Toni e Bepi
di Isidoro Perin
Meio na cantada che n'aspirina
- Ciao Toni! Bevetu un’onbra?
- Ànca massa: ’i me tira via el gas, ma pal vin no me manca ’e vide!
- Toni ’i à voia de inpiantar rogne e ’i è cata, te pol star sicuro.
- Ma no te vorà mia che ’i inpiante n’altra guera.
- Se va par quel no ’i se à mai fermà, se no l’è qua la è da n’altra banda.
- Quel che l’è stat el torna. Noaltri po’ sen senpre stai taca-brighe.
- Qua in Italia se vive massa ben, se deventa veci in massa tanti e finisse i sc-hei pae pension.
- Bisogna dir però che vemo ’na sanità dee meio che ghe n’é.
- ’I guarisse maeatie che ’na volta te morìa. ’I te trapianta el cuor, el figà, i reni, i polmon, brassi, gambe…
- ’I te à slongà ’a vita de diese, vinti ani, ma in che maniera? Casa nostra ghe n’è ’na cardensa piena de medesine pi’ che no dal spizièr!
- E co’ te va in ospedal no pol vegner trovarte nessun: un parént do volte aea setimana. Che un vecio co l’è maeà, che ’l tenp no passa mai, el se sinte rebandonà e ’l se assa morir, ànca parché manca el personal e no i pol esser vardai come che serve. Ghe n’è quei che no i ghe ’a fa gnanca verser ’na bustina de plastica par magnar un fià de formaio moesìn.
- E come fae a vèrder ’na butiglieta de àcua ’e nonéte coe man deformàe dae atròsi? Magari e à diese fioi, ma nessun che pol ’ndar trovarla almanco un’ora al dì!
- Senpre meio de na volta: pensa che sento ani fa ’i podéa ’ndar trovar el maeà ’na volta aea setimana! Che ghe n’è ànca ’a canson: “E dopo gli oto giorni suo papà l’è ’ndà trovarla; -Nineta come vala? –Popà mio, popà mio, popà mio la mi va mal”.
- ’E ’a cantéa ’e Fiandere de Arcade, ma ànca tute ’fiandere de ’na volta!
- Cussì ’i à senpre fat ànca i Alpini e tuta ’a zente dei nostri paesi.
- Parché cantar l’è ’na medesina che fa meio de na ’spirina’.
- Co’ te canta no te fa barufa co’ nessun, te passa el nervoso, te vien l’apetito e un goto de vin nol te inbriaga mai!
- Se i nostri poitici ’i fesse cussì, no ghe mancarie el gas a nessun!
- Aea saeute Toni!
- Aea toa Bepi e a tuti quei che ghe piase cantar!