Paure e speranse - Sezione Alpini Treviso

Vai ai contenuti

Paure e speranse

Fameja Alpina > Toni e Bepi
Toni e Bepi


di Isidoro Perin
Paure e speranse
 



  • Ciao Toni! Bevetu un’onbra?
  • Grasie Bepi. Come vaea?
  • Come al soito, ’a femena bròntoea, i doeòri se fa sentir…
  • Stropate e rece, ostrega!
  • Co’se véa vinti ani iera tuta n’altra roba.
  • Se véa pi’ voia, che femene, no se savéa cossa che i ièra i doeori, i s-chei i ièra na’ roba foresta pa’ ’e nostre scarsée…
  • Se véa però pi’ libertà, no ghe iera in giro ’sta manega de deinquenti.
  • ’A me casa no vea né ciave, né canevazh, adess bisogna che te meti inferiade, porte blindàe, antifurto…
  • E gnancòra no basta. I vien dentro e i te copa par gnent, tanto i sa che e nostre legi no è conta un’ostrega: in Italia i sassini i li moea fora quasi suìto.
  • Ma se me toca a noaltri… prova ti a pasar col semaforo ross, ànca se i te à tirà via el zal, te vedarà se no i vien trovarte casa.
  • Almanco soto naja, co’ ’l Capitano te punìa te savéa che te véi torto marso.
  • E ’l véa ànca el vissio de darte undese dì de consegna, se te ièri in do, in modo che te dovei  rangiarte par far metà par on!
  • L’è là che ven rinforsà el senso de solidarietà e amicissia, stando insieme, dividendo tut, anche ‘e fregature déa morosa.
  • Ma ànca dopo, a casa, co se ‘ndéa in bici, se se saeudéa, se podéa ciacoear, corer in paro…
  • Adess come se fa, serài dentro ’e nostre scatoete de fero, ligài come saeadi, no se pol gnaca tirar via ’e man dal voeante o vardar in giro.
  • Se deventa foresti par forsa.
  • Ma ormai col petrolio a sento doeari e co’ l’inquinamento che ghe n’è, se dovarà ben scuminsiar a fermarse.
  • Chissà se l’ è proprio un mal.
  • Intanto co’ ‘a bici no te core el ris-cio del palloncino, e te pol bear un’onbra in pì, che almanco el vin nol aumenta come el petrolio.
  • E finalmente vardarse sui oci e parlarse ànca drìo ’a strada sensa paura che i te stire.
  • Aea saute Toni!
  • A noaltri alpini e a tuti i nostri amissi co’ tanti auguri de serenità pal prosimo ano!

                                         
Torna ai contenuti