Wiva 'l Monumento ai Alpini! - Sezione Alpini Treviso

Vai ai contenuti

Wiva 'l Monumento ai Alpini!

Fameja Alpina > Toni e Bepi
Toni e Bepi


di Isidoro Perin
Wiva ’l Monumento ai Alpini!
 



  • Vien qua Bepi che bevén un bianco!
  • Àa saeùte de tuti i Alpini!
  • Finalmente vén inaugurà el nostro monumento a Treviso!
  • Te à vist quanta ’sente e che festa.
  • Sàtu che l’è bel e ’l par bon ’l nostro monumento sui giardini, no é vero che l’è brut!
  • Ma a qualchedùn no ’l ghe piase; ghe à secà che no ’i ghe àbia dimandà ’l permesso a lòri.
  • Se ’a invidia fusse peòci!... Magari ’i se spetéa ’na consuénsa come esperti!
  • Parché quante laurée ghe vòl par capìr cossa che ’i é i alpini pàa nostra tèra.
  • L’è vero che sen ’sente alegra, e no sol che parchè qualche volta se à bevù un’ònbra in pì, ma ànca perché ven ’a cossiensa a posto.
  • ’Sente alegra, Idìo l’aiuta!
  • Chissà parché co’ te parla de poìtica, invesse, te vien el figà gross cussì!
  • Toni!... ’I me à robà ànca ’l futuro déi nostri fiòì!
  • ’Na volta noaltri Veneti se se copéa par lavorar, adess se se copa parchè i me à portà via ’l lavoro!
  • E i poìtici, invesse, dopo verme rovinà, par bona ussita ’i se à garantì pension e vitaìssi che ghe posse bastar ai fiòì de so’ fioi.
  • E ’i sèguita a governàr ànca co’ ’i è smontài dàa carega.
  • Cossa se pol far par far cambiar ’e robe?
  • Co vàrde sui òci me fiol me toca sbassarli: come fàtu a dirghe che bisogna èsser onesti, che bisogna fidarse de chi che vén mandà in Parlamento… ànca parchè no ’i ven mandài noaltri: ’i se à mess d’acordo tra de ’ori, ’i se à spartì ’e careghe, no i nostri problemi!
  • ’Sti passùdi, no ’i sa cossa che vol dir ciapar ’na vaìsa in man e dover ’ndàr guadagnarse da vìver distante da casa: se ’i provesse ’i savarìe cossa che vol dir magnar pan smoià col sudor, e in pì esser ciolti in giro fora pal mondo causa dei nostri poìtici.
  • Par noàltri ’a Patria la è senpre stada ’a nostra fameja: me à senpre bastà podér guadagnar ’na feta de puenta calda da magnar torno ’a tòea, sensa doverse vergognar de esser veneti-poentòni!
  • No me par de dimandar massa!

                                     
Torna ai contenuti