Magari piovesse!
Fameja Alpina > Toni e Bepi
Toni e Bepi
di Isidoro Perin
Magari piovesse!
- Ciao Toni! Bevetu ’n’onbra?
- No! Dame un spriss.
- Gatu bisogno de aqua?
- Mi no, ma ’e panoce sì.
- Ostrega se te gà rason. Ma qua invesse dea piova ’se rivà i Ufo.
- Ma ti ghe credetu ànca a ste’ semense?
- No ciò! Gò visto coi me oci; a Nervesa ghe ièra dei cerchi strani su un canp de orzo e nessun savéa spiegar da chi e come che i podea esser fati. ’Se vegnuo parfin i studiosi de ufologia.
- Par mi co’ ’sto caldo qualchedun scumìnsia a veder robe strane. Speren che piova.
- Varda che la xe ’na roba seria quasi come ’a patente a punti.
- Cosa votu dir?
- I gà spetà el caldo par farla partir, come ’e ferie che te è speti un ano e tée perdi co’ ’na piova.
- No te capise.
- Toni, te pensetu che ghe n’è zente che ga perso ànca otanta punti su un colpo sol, e ’a patente ’a ghe ne porta vinti. Me spièghetu dove che i mete quei che i vansa?
- A mi me vegnea da rider a vardar par teevision i vigili col notes e a pena in man par contar i punti: i ma parea el morto a scopa.
- Chissà dove che i varà messi ’sti punti, visto che no i sa ancora cosa farghene.
- Però bisogna dirlo! I primi dì tuti ’ndea pin pian, sul “Put” parfin i (1)gipon, che de sòito i te taia a strada coi sberleffi, i stea al so posto a sinquanta l’ora.
- Dopo ’na setimana, tut come prima!
- Credeme Toni l’è colpa del caldo, co ’ste (2)caldane e sensa piova ànca i (3)servéi normai ’i fuma.
- E dopo no te sa pi’ né quel che te fa, né quel che te disi.
- ….. Son drio pensar!.
- Co’ ti te pensa a mi me vien i sgrisui.
- Chissà se i nostri poitici co’ sto caldo i porta el capel de paia?
- Parché?
- Co’ tut quel che i cunbina e tut quel che i dise!?
- Par piaser bevi e tasi, prima che i te mete in gaéra.
- Ma mi no gò mia robà!
- Appunto! Bevi, tasi e va casa a pié!
Glossario:
(1)gipon: fuoristrada - (2)caldane: grandi calure - (3)servéi: cervelli.