No bisogna desmentegarse!
Fameja Alpina > Toni e Bepi
Toni e Bepi
di Isidoro Perin
No bisogna desmentegarse!
- Ciao Toni! Bevetu un’onbra?
- Grassie Bepi. Cossa pensetu de ’sta Adunata?
- Ciò ghe n’è tante comemorassion da far.
- Pa far puìto però bisognarie ricordarse ’e date, i nomi…
- Eco! Par farte un’idea, te ricordetu ti co’ che l’è scuminssià ’a bataglia del Solstissio?
- Ostrega, speta che pense… Me par che ièra el sedese giugno…
- Vedetu che te sbaglia. El sedese giugno del mienovessento quindese l’è ’l dì che ’l Sesto Alpini parte par conquistar el Monte Nero.
- Adess me ricorde anca ’a canson: “Spuntava l’alba del sedici giugno…”
- ’A Bataglia del Solstissio invesse ’a scuminsia el quindese de giugno, ma del mienovessentodisdoto.
- E chi se ricorda quando che l’è mort Francesco Baracca?
- El disnove giugno del mienovessentodisdoto proprio sua Bataglia del Solstissio, vedetu questa ’a so, ma ’i è ’ncora in tanti che crede che’l sia cascà dove che dèss ghe n’è el monumento.
- E invesse no, l’è cascà sua Busa dée Rane verso Bavaria.
- E ti Toni te ricordetu chi che à fat ’a canson del Piave.
- Me par che l’è stat un napoetan che l’à scrita ’a not del vintitrè de giugno mienovesentodisdoto, dopo vér savù cossa che ’i à cumbinà i nostri soldai sua Bataglia del Solstissio.
- Pensar quanti soldai Taliani e Stranieri che ’i à conbatù qua da Asiago al Grapa, e drìo tut el Piave.
- Dai Canadesi ai Mericani, dai Francesi ai Slovachi, dai Napoetani ai Sardi ai Siciliani…
- Bisognarà scuminsiar a ricordarse un poche de robe si-no, che memoria éa ’a nostra?
- Adess che co’ l’Adunata vegnarà a trovarme tanti amissi che vorà saver calcossa sua guera e sul Piave no sarìe proprio bel far ’a figura dei Alpini che ghe basta onbre e sopressa!
- Sì! Però a mi ’a memoria scuminsia a farme schersi.
- Se va par quel ànca mi ’na volta me bastéa ’na ociada che dopo me ricordée tut ànca a scuro!
- A proposito de scuro me ricorde che bel che ièra coa morosa trovarse a scuro par no véder i pecài che se féa!
- Se l’è par quel coa femena mi stuse ’a luce ànca dèss!
- Vaeà! Cossa vutu farme creder?
- No, no! Te dise ’a verità! Stuse ’a luce parché se me varde nudo me fae pecà mi sol!
- Aea saeute Toni!
- Àa nostra Bepi!