Co se deventa noni...
Fameja Alpina > Toni e Bepi
Toni e Bepi
di Isidoro Perin
Co se deventa noni…
- Ciao Toni scuminsién suìto co’ un’onbra.
- Ò capì, te si pien de dispiasseri.
- Son stà àa prima comunion de me nevoda.
- Che bel! Pai noni i nevodi ’i è ’na benedissiòn.
- Però ’a messa dovarìa esser ’na messa, invesse me paréa ’na sfilata de minigone, de tachi a spillo,… tute insbeetàe: ’e ’ndéa vanti e indrìo pàa césa come se è fusse àa sagra. E i omeni po’: coi tatuaggi dapartutt, coi cavéi lecài, inpomatài, tirài su a cresta!…
- Bepi! No te sì gnancora usà àa vita moderna: ànca ’a césa se adàta.
- ’I va messa ’na volta ogni tant e no ’i sa gnanca co bisogna star in zhenocio, o co bisogna alsarse.
- Però ànca ’e cansòn d césa no le è pì quée de ’na volta; le è brute che no te fa voia de cantarle.
- Al posto del’organo ’i sona ’a chitara che, par l’amor de Dio, ’a sarà ànca bèa, ma vutu meter?...
- Dove ée finie e canson de ’na volta ?... Quée de Nadal, de Pasqua, Dea Madona…
- E quée in latin: Pange Lingua, Alma Redenmptoris Mater, Vexilla Regis…
- Magari no se capìa ’na paròea, ma ’e te féa vegnér i sgrisoeòn alti cussì.
- L’è, che ’na volta se ’ndéa in césa e se inparéa a star fermi, a pregar, a star in siénsio, adess invesse se canbia ’e abitudini: a furia de tegner inpissàda ’a teévision e vardarla sensa gnanca badarla se deventa insemenìi!
- Però ’a publicità ’a resta e, par de no, quea te frega!
- L’altro dì ’a femena la è vegnùa casa con un pachét de pastiglie pàa prostata: - Ciàpa qua che è te fa ben… ’I ò dita par teevisiòn!
- ’A méa invesse la me à portà casa un pachét de bevaròn pal colesterolo: - Prova!... l’à dita ’a teévision!
- Ànca mi però ghe ò fat un bel scherso: ghe ò conprà ’a còea pàa dentiera! Quea dea publicità po’!
- Ma mi Bepi, satu cossa che ò cumbinà? Sicome che la è un fià mòea de susta, son ’ndat conprarghe ’e mudande aposta: ’e ò viste in teevisiòn!... A momenti me ciàpée ’a scòa ’so pàa schena!
- Aea saeute Toni!
- Àea prosima Bepi!