El Pont de Bassan o quel del Piave?
Fameja Alpina > Toni e Bepi
Toni e Bepi
di Isidoro Perin
El pont de Bassan o quel del Piave?
- Ciao Bepi! Fermete qua, che àlmanco savén su che ostarìa che se vén fermà!
- Ciò Toni, no so ti, ma varda che mi non son ’ncora ciòch.
- No te sa che al Pont de Bassan ’i ghe à canbià i connotati! Secondo ’a scrittrice Vittoria Calvani, el se trova sul Piave, e la ànca el coràio de scriver che, dopo Caporetto l’è deventà el sinboéo dea resistensa sul Piave, “un evento militare eroico che gà ispirà tante cansòn”!
- Beh! Se no altro, no te pol dir che la à copià, magari, pitòst, la se à fat ispirar dal Grappa o dàa graspa…
- Ma varda che l’è un libro de scuoea pae Superiori.
- Parché ti pensetu che i libri sia fati pa’ istruìr?... Anca, ma no senpre. Tanti ’i è fati par tante robe, magari importanti (come i sc-hei), ma no pai nostri fioi. Pensa che ghe n’è de quei che ’i é fati col “copia-incolla”. Anca do tre volta par pagina, cussì l’è come che te cambiesse el professor che spiega, ogni volta.
- No capisse ben Bepi.
- Toni! Co’ to fiol no capisse calcossa prova lèserlo ti, prima de dir che no’l capisse gnent o che no l’à voia de studiar!
- A proposito, àtu vist cossa che sucede da che ’i à fat ’e coìne del proséco “patrimonio dell’umanità”?
- Sì! Adess i arabi vol conprar i alberghi! ’I à scuminsià co’ quel de Fuìna: 4 milioni de euro!
- Però ’a parona ghe à dita de no! Par rispeto a so’ mare…
- Eco! El rispeto! I vigneti ’i è stati fati co’ amòr dai nostri veci, ma perché ’i sia un patrimonio par l’umanità bisogna rispetarli.
- E continuar a voérghe ben!
- Toni! Se va par questo, noaltri Alpini ven ’a cosiensa a posto!
- Aea saeute Bepi!